متلازمة التيجان

التاج

وصلنى من اختى العزيزة وينكى هدية صغيرة يسمونها التاج

ومن شروط هذا التاج ان اخبركم بخمسة اشياء لا يعلمها عنى احد

(ما اجملها من هدية)

امري الى الله

ركزوا معايا بقى فى الكلمتين الجايين دول

اولا : فوبيا الحقن

عندي رعب وفوبيا شديدة من الحقن منذ طفولتى البائسة ولا اعلم سرها حتى الان

المهم انى مرضت مرضا شديدا وانا طفل صغير ، واستدعى ذلك حقنى على وجه السرعة بناء على كشف الدكتور

اترجيت الدكتور وقلتله مستعد لأي حاجه الا الحقن قالى : اسف يابنى مفيش حل الا بالحقنة والا حالتك تتدهور جدا

روحنا على السيستر اللى هتدينى الحقنه ووالدى قالها خلى بالك لأنه بيخاف من الحقن

قالتلى اطمن دي حقنه صغيرة خالص وانا ايدي خفيفة، المهم شوفتها بتحضر حقنه كـبيـــــرة ...جن جنونى وروحت مفلفص من ايد ابويا وجريت وقلت يا فكيك ، يومها كان اعمامى معانا وجريوا مع بابا ورايا

وانا اجري وانط من فوق الكراسى والناس لغاية اما وصلت بره المستوصف للعربية وروحت داخل وقفلت على نفسى ، طبعا والدى فتح ومسكنى... بس بقوة المرادي ، وروحنا واتكتفت تكتيفه تمام واخدت الحقنه بس بعد ما فضحت الدنيا بصراخى وبعديها والدى العزيز اخدنى على محل العاب اطفال وصالحنى بمجموعة العاب

بس عقدتى كبرت اكتر واكتر تجاه الحقن ، ولا زالت ملازمانى حتى الان

طبعا يومها انا استغربت من نفسى جبت القوة دي منين ، رغم وهنى وضعفى الشديد ؟؟ !! بس انتم عارفين ..الأدرينالين له مفعول السحر

ثانيا: الشاب الرومانسيي

فى يوم من الايام الجميلة خرجت مع خطيبتى ..اللى هي دلوقتى زوجتى العزيزة.. وروحنا كورنيش النيل فى المعادي

والقعدة كانت ظريفة جدا

المهم

كان فى المكان اللى احنا قاعدين فيه بيعدي من فوقنا طيارات كل شوية ،

(الظاهر ان فى مسار للطيران فى المنطقة دي)

انا من النوع اللى بيحب علوم الطيران وقريت كتير فيه وكنت اخدت كورس محترم فيه كمان

لما شوفت الطيارات كل شوية بتعدي كنت بتأمل فيهم ولما مرت اخر طيارة من فوقنا.. قولتلها دي طيارة ايرباص وفجأه سألتها : تعرفى تفرقى بين الطيارة البوينج والطيارة الايرباص؟

قالتلى لأ

قولتها : الفرق ان دي فيها كذا وكذا وبدن الطيارة بيبقى...... الخ الخ

قعدت اتكلم واشرحلها فترة طويلة جدا وكنت مندمج جدا فى الشرح وبعد ما خلصت

راحت قايلالى: الله ....دا احلى كلام رومانسى سمعته فى حياتى !!!! طبعا اخوكم اتحرج ولسانه وقف

ومش عاوز اقولكم على اللى حصل يومها .....الطيب احسن

ثالثا : الشاب الخنيق

وانا قاعد فى يوم فى الجامعة مع انسانه زميله فاضلة منتظرين معاد السيكشن ، جت واحدة صديقة لزميلتى من كلية اخرى وسلموا على بعض وراحت قاعده معانا

فجأه واحده تانية ندهت على زميلتى وقالتها انا عاوزاكى ضروري

زميلتى استأذنت وسابتنى مع صديقتها

فضلت قاعد ساكت ومالقتش حاجه اقولها

(نسيت اقولكم ان ايامها كانوا شالوا الجنزوري من رئاسة الحكومه وجابوا مكانه عاطف عبيد الرجل المبتسم دائما)

قلت بس ....لقيتها.... اكلمها عن التعديل الوزاري

اخوكم فضل يتكلم ويستفيض فى الحديث وهى قاعدة بتبصلى كالبلهاء وفاتحه بؤها وعيونها مبرئين

اخدتنى الجلالة وفضلت اشرحلها فى وجهة نظري وحنقى الشديد من انهم شالوا الرجل المحبوب وحطوا مكانه الرجل الاهم فى عملية الخصخصة واللى هيبيع البقية الباقية من شركاتنا الوطنية وكرامتنا

وفضلت اتكلم لغاية اما الاخت دي راحت قايمة واعتذرتلى بشياكة ان وراها محاضرة ومشيت بكل هدوء

مفيش 5 دقائق ولقيت زميلتى جاية تجري وبتقولى انت ايه اللى عملته فى البنت؟؟ بتكلمها فى السياسة والجنزوري وبلاوي الحكومة واختيار الوزراء؟؟!! انت خلاص فقدت التمييز؟؟ البنت متعقدة ومصدومة!! حرام عليك

يومها اكتشفت انى عايش فى زمن غير زمنى او بمعنى اصح مش فى مكانى الصحيح

رابعا: الصراصير

انا بخاف جدا جدا من الصراصير وبقرف منها جدا وبعتبرها كائنات مقززة منفرة بشعة

وانا فى الفرقة الاولى فى الكلية كان عندنا مادة بنشرح فيها 3 انواع من الكائنات

الضفادع والسمك واخيرا الصراصير

اول سيكشنين عدوا على خير، ولما جينا لسيكشن تشريح الصرصار .. حصلى تغير فى لون الوجه وتسارع فى ضربات القلب ورعشه شديدة فى اليد

ورفضت ان اشرحه تحت اي ظرف من الظروف

الدكتور حاول معايا بشتى السبل ، وقعد يلعب بالصرصار فى ايديه عشان يكسر رهبتى وبرضه مفيش

فقالى: كل الناس شرحوه اهم .... حتى البنات .. انت هتعملى فيها الشاب الطرز؟ ..بكسر الطاء والراء وتسكين الزين

قلتله يا دكتور انا اصلا لما بشوفه فى اي مكان مثلا بقرف اضربه بالشوز حتى.

المشكلة الكبيرة بقى يا جماعة ان فى امتحان نهاية الترم لازم اشرح الصرصار عشان انجح ورفضت برضه اشرحه

ايوة نجحت .. بس ما تسألونيش ازاي؟؟

واخيرا انا عاوز اقولكم ان احلى واهم تاج فى الحياة هو تاج الصحة

الصحة تاج على رؤوس الأصحاء لا يراه الا المرضى

امبارح جالى صداع فظيع جدا ومؤلم بشكل بشع وكنت متدمر خالص ، قعدت افكر وقلت ربنا لو عاوز يبتلى حد او يعذبه فى الدنيا

ممكن ابسط حاجه يبتليه بصداع او مرض مزعج مالوش علاج او فشل كلوي مثلا ويفضل طول عمره يزور المستشفيات عدة مرات فى الاسبوع عشان يغسل الكلى

بعيد عن السامعين ......... عافانا وعافاكم الله وخفف عن جميع مرضى المسلمين

الصحة هى افضل نعمة فى الحياة.. ادعو الله ان يتمم نعمته عليكم بالصحة والعافية

امين

تحياتى يا أعز الناس

احب اهداء التاج الى اخوتى هيثم ابو عقرب دور عالبعد الثالث وعمرو احمد اريدك انثى والى دكترة والى

Drowning خالد عبد الحليم حواديت والى اختى العزيزة باسمة مش حب وبس والى يارا

وبالشفا انشاء الله